Contoh Naskah Teks Monolog Bahasa Jawa Singkat yang Menarik
Contoh Naskah Teks Monolog Bahasa Jawa Singkat yang Menarik – Sejumlah ahli bahasa mengatakan kalau monolog berasal dari bahasa Yunani yang tersusun dari kata mono dan legein.
Mono memiliki makna satu sementara legein memiliki makna bicara. sehingga dapat dimaknai bahwa monolog adalah satu orang bicara.
Jika dilihat dari tata cara melakukannya, monolog dapat digolongkan ke dalam seni teater.
Jika kamu ingin membuat naskah monolog ada beberapa hal yang harus diperhatikan. Hal ini dikarenakan monolog yang baik harus mencakup sejumlah aspek.
Aspek-aspek Penulisan Monolog
- Kesesuaian tema
- Penguasaan karakter
- Penguasaan panggung
- Properti dan kostum
- Dekorasi
- Vokal dan intonasi
Setelah mengetahui aspek-aspeknya. Kini waktunya kamu baca contoh naskah teks monolog bahasa Jawa di bawah ini.
Contoh Teks Monolog Bahasa Jawa
Nalika Aku Dhapuk Dadi Asu
Dina iki aku dilairake maneh. Ora kaya padatane, dina iki lair maneh kanthi wujud asu.
Aku ngerti ana saperangan manungsa kang nganggep asu kewan paling nistha. Nanging aku ora trima karo penganggep kuwi.
Jalaran akeh sing nganggep asu kuwi mujudake mitrane manungsa kang paling setya.
Senajan blegerku iki asu lan sikilku dhingklang pisan nanging aku babar pisan ora nggresah marang Gusti kang wis menehi aku wektu nyecep endahing donya.
Pasar kulon desa kae wis dadi papan panguripanku saben dina. Ya ing papan iku aku nggantungake uripku saben dina. Ing kono wis cumepak panganan maneka werna.
Wiwit panganan kelas rakyat nganti konglomerat uga wis sarwa cumepak tur ora perlu mbayar. Coba pikiren kurang apa maneh uripku iki.
Upama yen dibandhingake marang uripe manungsa rak ya beda adoh. Aku ora sarujuk yen manungsa diarani makhluk kang paling mulya.
Akeh banget tumindake bangsaku sing luwih apik tinimbang manungsa. Pancen aku iki asu cilik sing penggaweyane ngorak-ngraik reregedan kanggo mangan iku ngono rak ya lumrah ingatase aku iki mung kewan cilik tanpa daya.
Coba luwih reged endi yen dibandhingake tumindake pejabat-pejabat sing lungguh nang gedhung kang tingkat kae.
Senajan katone wong-wong kae lungguh ing dampar kencana sarta ruwangane sarwa AC kae. Pancen sandhangane sarwa resik tur wangi. Iku yen disawang teka panyawange manungsa.
Coba sampeyan nyawange saka panyawangku. Panyawange asu cilik tanpa daya. Saka pucuke rambut nganti pucuke sikil samesthine sampeyan bakal meruhi apa wae kang tinulis ing sandhang penganggone para pejabat sing khianat marang rakyat kae.
Apa maneh nalika sampeyan nyawang apa kang didhahar para pejabat khianat mau. Panganane mesthi kelas elit. Rega panganane bisa kanggo mangan rakyate sewulan .
Perkara rega jane ngono ora dadi ngapa nanging sing dadi perkara ing kene saka ngendi dhuwit kanggo mbayar panganan mau.
Nalika daktlesih lumantar kandhane balung turahane pejabat mau aku lagi ngerti yen dhuwit kanggo mbayar iki ngono jane dhuwite rakyat.
Jarene para pejabat ngono dhuwite rakyat iku rasane luwih nikmat. Hla nek ngene rak ya kojur tenan.
Aku ora percaya yen ing sajroning atine manungsa isih ana tresna. Maksudku dudu tresna kang ngandhut talining asmara. Nanging tresna minangka jejere sapadhaning titah kang jumangkah ing alam donya.
Kandhaku iki ora nganyuwara nanging iki ngono jarene kancaku sing manggon ing ngisor bangjo kulon bale desa kae.
Yen miturut kandhane ngakeh, kancaku iki edan. Nanging kanggoku ora dheweke iku malah dakanggep manungsa waras saka manungsa sing paling waras.
Jarene nalika semana. Wektu iku ngarepake magrib, wiwit sore udane deres banget. Banjur aku ngiyup ing pos kamling.
Ya ing pos kamling iki aku tetepungan karo kancaku mau. Dheweke ngaku yen duwe jeneng Parto.
Saka patepungan mau aku lagi weruh yen manungsa iku senengane nyacat siji lan sijine. Aku dhewe sempet ora percaya marang kandhane Parto mau.
Amarga ora ana siji-sijiya makhluk ing alam donya kang sampurna. Isih jarene Parto ana saperangan manungsa ang senengan rerasan ngenani wadining liyan.
Wewadi sing samesthine disimpen rapet nanging malah diumbar kaya barang dagangan wae.
Saliyane iku uga ana saperangan manungsa kang seneng nyacat kurane liyan. Upama ana sapadhaning manungsa kang ana kurange wis kaya barang mesthi pawongan mau dadi kembang lambe.
Endi sing alok merga wong tuwane biyen nate tumindak culika. Apa malah iku ngono asil saka pakartine dhewe.
Krungu kandhane Parto mau aku kaget kok manungsa tumindak kaya mangono.
Aku dhewe iki sing jejere asu cilik kang dhingklang wiwit lair procot nganti dina iki durung ana siji-sijiya bangsane asu ang ngilokake aku.
Malah-malah kadhang kala yen tumuju aku lara kancaku asu wetan kali kae kerep nggawakake balungan. Apa manungsa ora isin kalah karo asu.
Saliyane iku endi ana asu sing tega mateni anake dhewe. Nganti seprene coba dideleng mbuh wis pirang atus utawa malah pirang ewu bayine manungsa kang mati merga klairane ora dikarepake dening wong tuwane.
Mbuh jarene merga bayi mau asil sesambungan peteng antarane wong kang slingkuh utawa bayi mau asil sesambungane para wanita kang kelangan prawane merga wis nerak angger-anggering tata krama lan tata agama.
Apa wong iku ora bisa mikir yen bayii iku mau salahe apa. Amarga sangeriku samubarang kang lair ing alam donya iku bisa diibaratake kertas putih kang durung ana tulisane siji-sijiya.
Aja maneh bayine manungsa bayine asu wae lair ing donya iku padha-padha bisa dibaratake kaya kertas putih, gumantung sapa sing nggulawenthah.
Yen sing nggulawenthah becik samestine mbesuk dadine uga bakalan becik. Tuladhane aja adoh-adoh. Ora usah nggawe tuladha saka bangsane manungsa
kamangka upama ana klirune manungsa mau rak ya bakal njaluk pertanggungan jawabanku. Banjur terus kepriye anggenku nglurusake marang manungsa mau.
Kamangka sing bisa cecaturan klawan aku saliyane Parjo sing jarene ean mau, yaiku wong kang nduwe ngilmu aji gineng.
Ngenani sapa kang bisa cecaturan marang aku dakdudohake mengko wae. Bali maneh ing babagan panggulawenthahan.
Saiki coba dideleng mbuh ana pirang pakaryan kang ditindakake dening manungsa kang mbutuhake kaluwihane bangsane asu. Wiwit saka polisi nganti tukang mbebedhak alas padha mbutuhake tenagane asu.
Banjur sapa manungsa kang bisa nduweni aji gineng mau. Wong kang duwe aji gineng yaiku sawijining pemimpin kang bisa dadi patuladhan dening para kawulane.
Nanging apa iya ing jamane iki isih ana pawongan kang kaya mangkono? Sangertiku pawongan kang bisa nduweni aji gineng kang pungkasan yaiku Prabu Angling Dharma.
Akh… dakkira ing jaman saiki wis ora ana pemimpin kang bakal ngrungokake pisambate asu cilik kaya iki.
Hla ngrungokne pisambate kawulane wae ora gelem malah-malah kabeh para pemimpin saiki lagi mangsane mripat micek lan kuping mbudeg.
Wiwit bangsane cacing nganti bangsane memedi, jin syetan priyangan kabeh padha ngerti yen negara iki mujudake negara maritim.
Mula aneh banget kanggoku yen negara iki kok malah ngimpor iwak. Iki apa wis edan batinku.
Menawa yen ditandhingake ing babagan kasetyan antarane manungsa lan aku kang bangsa asu mesti wae bangsaku sing bakalan menang.
Kamangka ora ana siji-sijia makhluk kang ana ing alam donya iki nduweni kastyan kaya aku.
Wis akeh bukti kang ngandharake aku iki makhluk kang paling setya. Ora mung setya marang pasangane nanging uga setya marang bendarane.
Coba dideleng utawa nek panjenengan kersa maca saperangan lelakone kancaku saka negara seberang mesthine sampeyan ngerti.
Sampeyan rak nate keprungu ana sawijining asu kang diupakara kanthi becik dening sawijining guru.
Merga diupakara kanthi becik mulane antarane asu mau klawan guru nduweni rasa kang angel dimangerteni dening manungsa lumrah.
Jalaran saben dina kang ngeterake guru lan kang nyusul guru mau ya asu wsing nate ditulung mau. Asu mau kaya-kaya bisa tata jalma lan mangerteni males budi.
Saliyane iku guru ing kene dudu sembarang guru. Guru ing kene sawijining guru kang pantes digugu lan ditiru.
Dene yen ndelok lakune jaman kang tansaya edan iki aku isih tidha-tidha apa iya isih ana guru kang ora melu edan.
Kamangka ing saben-saben dina sing dakrungu mung guru kang wis ora oantes sinebut guru. Saka warta kang dak rungu mau isih ana wae guru kang tumindak asusila marang muride.
Aku rumangsa isin yen keprungu warta kang kaya mangkono mau. kamangka guruku asu dhewe ora ana kang tumindak kang kaya mangkono.
Bali maneh ing babagan males budi. Apa iya manungsa bisa males budi kaya asu iku mau.
Yen dak pikir kok angel banget nemoni manungsa kang nduweni sipat kaya asu iku mau jalaran lumrahe manungsa dina iki yen wis enak-enak lungguh ing dampar kencana wis lali marang sekabehane.
Terus yen wis kaya mangkene apa manungsa isih ora isin yen kalah karo asu. Banjur apa manungsa isih ora isin yen ngomong aku iki makhluk kang paling nistha.
Miturut pamawasku dina iki isih akeh manungsa kang tumindake luwih asor tinimbang asu.
Aku asu cilik kang mlaku dhiglak-dhigluk. Aku seneng dadi asu kamangka isih akeh manungsa kang sipate luwih awon tinimbang asu.
Huk…hukk..hukkkk aku nyoba ngungkapake rasa seneng ing atiku.
Demikianlah contoh naskah teks monolog bahasa Jawa. Semoga artikel contoh naskah teks monolog bahasa Jawa ini menambah wawasanmu tentang dunia teater, khususnya seni monolog.
Klik dan dapatkan info kost di dekat kampus idamanmu: