11 Contoh Geguritan Tema Kemerdekaan Indonesia Bahasa Jawa Singkat

Contoh 2

Udan Mimis

Segara getih kutah ing tanah nuswantara

Atusan nyawa musna

Katerjang mimis kang nggembol pepati

Tumrap para putra lan putri

Kang ora lila nyawang ibu pertiwi

Dirudapeksa dening bangsa manca

Kasebar ing tanah ora ana wong

Sawah, tegal, lan alas

Dadi seksi

Kaprawirane kusuma bangsa

Adol nyawa kanggo kamardhikane bangsa

Sawijining prajurit mbengok sora

Ngangkat dhuwur panji gula klapa

Tangan kiwa nyekel gegaman

Nantang penjajah sing duwe ati denawa

Mung ana rong tembung kang kawetu

Mardhika utawa mati

Sanalika dudu grimis kang dumadi

Nanging mimis kang nyebar pepati

Senajan ludira kasuntak lan raga

Ndhepani bantala

Nanging ora nyuda gilige tekad

Para pahlawan ngoncatake para penjajah

Bali menyang negarane

Murih kamardhikan sing wis suwe

Dienteni tekane ora dadi impen

Kang ilang katerjang angin sore

2022

Baca Juga :

11 Contoh Geguritan Bahasa Jawa tentang Ibu dan Ayah Singkat Penuh Makna

Contoh 3

Nasibe Pejuang

Nganti saiki wis ewonan liter getih kutah

Nganti saiki wis ewonan nyawa wis ilang

Nganti kaping wis ewonan luh kutah

Nangisi kadang kang pralaya

Merga ngupayakake kamardhikane bangsa

Ana rega sing kudu dibayar

Kanggo mujudake kamardhikane Indonesia

Kamardhikan sing ora mung impen

Kamardhikan sing bakal ngowahi sejarahe bangsa

 Jamane pancen wis mardhika

Ananging isih akeh sing lali

Nora ngucap atur panuwun mring para pahlawan

Kang wis ngurbanane jiwa lan raga

Kanggo kamardhikane bangsa

Ing jaman kang wis sarwa kepenak

Akeh sing tumindake sapenakake dhewe

Para pejuang dilalekake

Para pejuang dijarake

Urip kelunta-lunta

Ing dalan-dalan

Nempil kawelasan kanggo nyambung

Urip ing dina kang tansaya rengka

Ing ngendi papan dununge rasamu

Nyawang pawongan sing wis wani

Kekancan pati murih kamardhikan

Dudu sawates ana ing alam impi

Sliramu ngguyu lakak-lakak

Mbuwang panganan sapenake

Mangka pawongan sing merjuangake

Kamardhikan sasate ora nate

Mung bisa kelebon sega wetenge

Yen ana wong kang kersa

Andum kawelasan marang slirane