17 Contoh Teks Geguritan Bahasa Jawa dan Strukturnya yang Baik dan Benar

Contoh 11

Judul: Arga Iki
Karya: Siswidiadi Ngesti N

Mataun-taun
Sira ngrusak geger lan awakku
Makaping-kaping
Landhepe bendho lan pacul

Nyigar lemah subur dadi larik-larik tandur
Pokalmu mblandhong sapenak dhengkul…
Lemah ijo wis malih gundhul
Tirta musna ing mangsa ketiga

Ninggal belik nalika paceklik
Jare wadhuk dadi alesan
Ora bakal ana rampunge
Nadyan donya pisan

Denuntal sakabehe
Yoh
Entenana
Yen tekan titi mangsa
Arga iki nagih prasetya

Baca Juga :

15 Contoh Geguritan Bahasa Jawa Singkat, tentang Pendidikan Sekolah, Alam, Lingkungan, dan Pahlawan

Contoh 12

Judul: Kidung Wengi
Karya: Hadi Pamungkas

Wengi wis lumingsir jero
Cahyane sang candra katon surem
Tumiyung mangulon mapag tekane gagat raina
Kahanan katon tintrim

Mung swarane jangkrik sesahutan ngumbar lelagon
Kala-kala jegoge asu sing mecah wengi
Jalma manungsa wus padha lerem ing pangimpen
Nepsu-nepsu panguripan uwal saka nala

Gumanti impen-impen kang endah mbuntel panjangka urip
Mung kemrosake manuk codhot nrusuk ing pang-pang wit pelem
ngluru woh-wohan nggo ngganjel weteng
Sakwuse sawengi natas ngancani sepining bawana

Swarane jago kluruk padha pamer swara
Minangka pratandha yen bagaskara bakal tumeka
Cahya warna abang rampak-rampak
Pratandha ngjak jalma miwiti makarya

Ngobahake raga
Ngudi rejeki ngluru pangupajiwa
Sakwuse madhep kiblat
Ing tengahing pedhut manjing subuh
Nyeyuwun nugrahaning kang Maha Rat

Contoh 13

Judul: Sendhang Tirta Panggesangan
Karya: S.Wignya Raharja

Kinclong, klimpah-klimpah, kumricik ilining toya
Pating sliri tawes, wader pari dalasan anggang-anggang
Sedaya memuji mring Hyang Widhi
Tanpa sih Paduka Gusti

Dados punapa awak mami?
Widodari kayangan sami lelumban
Tumurun madyaning sendhang
Jamas, reresik tan emut ing wanci

Kamanungsan si Tarub
Segering tirta sendhang dadya panjanging yuswa
Saiba bombong kula nyumurupi
Sesami titahing Gusti anjagi lestari

Punapa boten rumaos
Punapa sampun wuta tyasira
Kutu-kutu walang ataga sami sun cawisi
Kantho lelahanan tanpa nyulihi

Ngantos telas tan nyisa kula legawa
Nanging geneya?
Kori kula kasumpet aspal
Beton, ngantos nduwa margi kula

Kados pundi punika Gusti?
Nyingkur kawula, Gusti …
Sok sintena ingkang mireng pisambat kawula
Keparenga paring marga

Satemah boten namung kabuncang muspra
Kepara damel kasangsaran dhumateng manungsa
Kula kapang dados sendhang tirta panggesangan

Contoh 14

Judul: Endahe Alam
Karya: Arvie Diah Pratiwi

Yen mandheng alam iki
Pikiran susah dadi endah
Anggugah semangat urip kangge jiwa iki
Ati pun dadi sumringah lan bungah

Yen ndeleng uwit ijo royo-royo
Awujud ciptaan sing kuasa
Lan kesucian sinar surya
Kanggo padhange dunya iki

Puji syukur matur nang Gusti Allah
Marang kaendahan isine ing bumi
Sing kudu dijaga lestariane
Tanpa ngilangake kaendahane

Contoh 15

Judul: Tresnaku-Tresnamu
Karya: Biyung Amie Williams

Rikala kori dakbukak byak
Kaya sinamber gelap lepat
Iki tenan apa ngimpi?
Sliramu jumeneng nyunggi katresnan

Panggah ora owah
Dinodhog rasa jroning dhadha
Meh wae aku kantaka.
Angenku daklarak ing pangumbaran

Telungpuluh loro warsa kepungkur
Kangmas,
Rasa tentrem rinengkuh ing astamu
Edhum nyawang sorot netramu

Aku katrem, aku kasmaran
Engga wektu jumangkah mlaku
Tresnaku-tresnamu dadi rangu
Kelindhes wektu

Daktantang daktanting ora maelu
Sansaya adoh lumayu
Tangeh anggonku bakal ngluru

Kangmas,
Tresnaku tresnamu ginubel wektu
Lawase padha paprentahan Orde Baru
Wis kukut, wis kemput

Nadyan nora bisa nyawiji
Nanging tresna aji lan suci, tresna sejati
Bakal dakrukti nganti tumekeng janji

Contoh 16

Judul: Sekolahku
Karya: Sri Lestari

Sekolahku cilik ana pinggir kali
Swara bocah ngguyu dadi gendhinging esuk
Papan tulis kebak aksara urip
Sing dakrangkai dadi impenan mangsa ngarep

Guru-guruku ora sugih banda
Nanging sugih sabar lan pangurbanan
Saben tembung dadi pepadhang
Ing dalan petenging kawruh

Sanajan tembok retak lan kursi wis lawas
Semangat ora nate gingsir
Saka kene aku sinau ngimpi
Lan sinau wani nguber gegayuhan urip

Contoh 17

Judul: Janji marang Ibu
Karya: Dwi Prasetya

Ibu,
Aku isih bocah sing kerep kliru
Kerep mbalela marang pituturmu
Nanging atiku ora nate adoh saka tresnamu

Tangismu kadhang tak rungokake meneng-meneng
Nalika aku turu kebak pangimpen
Kowe ndonga tanpa leren
Muga dalanku ora kesasar

Ibu,
Aku ora janji dadi wong paling sugih
Nanging aku janji dadi wong sing temen
Sing ngugemi ajaranmu nganti pungkasan uripku

Penutup

Nah, itulah informasi ringkas terkait contoh teks geguritan bahasa Jawa dan strukturnya yang bisa Mamikos bagikan.

Semoga informasi di atas bisa membantu kamu dalam memahami teks geguritan bahasa Jawa ya!

Jika kamu ingin mencari informasi lainnya, kamu bisa kunjungi situs Mamikos dan temukan informasinya di sana.